Monday, 21 March 2022

ತೈಲ ದರ ಹೆಚ್ಚಳಕ್ಕೆ ತಾನು ಹೊಣೆಯಲ್ಲ: ಸೌದಿ ಅರೇಬಿಯ


ತೈಲ ದರ ಹೆಚ್ಚಳಕ್ಕೆ ತಾನು ಹೊಣೆಯಲ್ಲ: ಸೌದಿ ಅರೇಬಿಯ

ದುಬೈ: ಜಾಗತಿಕ ಮಾರುಕಟ್ಟೆಯಲ್ಲಿ ತೈಲ ಪೂರೈಕೆಯಲ್ಲಿ ಆಗಿರುವ ಕೊರತೆಯ ಹೊಣೆಯನ್ನು ತಾನು ವಹಿಸಲು ಸಾಧ್ಯವಿಲ್ಲ ಎಂದು ಸೌದಿ ಅರೇಬಿಯ ಸೋಮವಾರ ಸ್ಪಷ್ಟಪಡಿಸಿದೆ

ವಿಶ್ವಮಾರುಕಟ್ಟೆಗೆ ಅತ್ಯಧಿಕ ತೈಲ ಪೂರೈಸುವ ದೇಶವಾಗಿರುವ ಸೌದಿ ಅರೇಬಿಯವನ್ನು ಗುರಿಯಾಗಿಸಿ ಯೆಮನ್‌ ನ ಹೌದಿ ಬಂಡುಗೋರರು ಇತ್ತೀಚೆಗೆ ನಡೆಸಿರುವ ನಿರಂತರ ದಾಳಿಗಳು ತೈಲ ಉತ್ಪಾದನೆ ಮತ್ತು ಪೂರೈಕೆ ಪ್ರಕ್ರಿಯೆ ಮೇಲೆ ಪರಿಣಾಮ ಬೀರಿದೆ. ತೈಲ ಪೂರೈಕೆಗೆ ಸಂಬಂಧಿಸಿ ಸೌದಿ ಅರೇಬಿಯ ನೀಡುವ ಕಿಂಚಿತ್ ಹೇಳಿಕೆಯೂ ತೈಲ ದರದ ವ್ಯಾಪಕ ಬದಲಾವಣೆ ಮತ್ತು ಜಾಗತಿಕ ಮಾರುಕಟ್ಟೆಯಲ್ಲಿ ಭಾರೀ ಸಂಚಲನಕ್ಕೆ ಕಾರಣವಾಗುತ್ತದೆ. ಆದ್ದರಿಂದ ಅತ್ಯಂತ ಎಚ್ಚರಿಕೆಯಿಂದ ಹೇಳಿಕೆ ನೀಡುತ್ತಿದ್ದ ಸೌದಿ ಅರೆಬಿಯಾ ಈ ಬಾರಿ ಕಟುಧ್ವನಿಯಲ್ಲಿ ಹೇಳಿಕೆ ನೀಡಿರುವುದು ಗಮನಾರ್ಹವಾಗಿದೆ ಎಂದು ಮಾಧ್ಯಮಗಳು ವರದಿ ಮಾಡಿವೆ.

 ಹೌದಿಗಳ ವಿರುದ್ಧ ನಿಲ್ಲುವ ತನ್ನ ಜವಾಬ್ದಾರಿಯನ್ನು ಅಂತರಾಷ್ಟ್ರೀಯ ಸಮುದಾಯ ನಿರ್ವಹಿಸುವ ಮೂಲಕ ಇಂಧನ ಪೂರೈಕೆ ಪ್ರಕ್ರಿಯೆ ಸರಾಗವಾಗಿ ಮುಂದುವರಿಯುವಂತೆ ನೋಡಿಕೊಳ್ಳಬೇಕು. ಹೌದಿಗಳ ನಿರಂತರ ದಾಳಿಯು ಸೌದಿಯ ತೈಲ ಉತ್ಪಾದನೆಯ ಸಾಮರ್ಥ್ಯ ಮತ್ತು ಬದ್ಧತೆಯನ್ನು ಈಡೇರಿಸುವ ಶಕ್ತಿಯ ಮೇಲೆ ಪರಿಣಾಮ ಬೀರಲಿದೆ ಮತ್ತು ಜಾಗತಿಕ ತೈಲ ಮಾರುಕಟ್ಟೆಗೆ ಇಂಧನ ಪೂರೈಕೆ ಪ್ರಕ್ರಿಯೆಯ ಭದ್ರತೆ ಮತ್ತು ಸ್ಥಿರತೆಗೆ ಬೆದರಿಕೆಯಾಗಿದೆ ಎಂದು ಸೌದಿ ಅರೆಬಿಯಾದ ವಿದೇಶ ಸಚಿವಾಲಯದ ಹೇಳಿಕೆಯನ್ನು ಉಲ್ಲೇಖಿಸಿ ಸೌದಿ ಸರಕಾರಿ ಸ್ವಾಮ್ಯದ ಸುದ್ಧಿಸಂಸ್ಥೆ ಸೌದಿ ಪ್ರೆಸ್ ಏಜೆನ್ಸಿ ವರದಿ ಮಾಡಿದೆ.

ಸೋಮವಾರ ಜಾಗತಿಕ ಮಾರುಕಟ್ಟೆಯಲ್ಲಿ ಬೆಂಚ್ಮಾರ್ಕ್ ಕಚ್ಛಾತೈಲದ ದರ ಬ್ಯಾರಲ್ಗೆ 112 ಡಾಲರ್ ತಲುಪಿದೆ. ರವಿವಾರ ಹೌದಿ ಬಂಡುಗೋರರು ಸೌದಿಯ ತೈಲ ಮತ್ತು ಪ್ರಾಕೃತಿಕ ಅನಿಲ ಉತ್ಪಾದನಾ ಕೇಂದ್ರಗಳನ್ನು ಗುರಿಯಾಗಿಸಿ ಸರಣಿ ದಾಳಿ ನಡೆಸಿದ್ದರಿಂದ ಕೆಂಪು ಸಮುದ್ರ ದಡದಲ್ಲಿನ ಯಾಂಬು ಪೆಟ್ರೊಕೆಮಿಕಲ್ಸ್ ಕೇಂದ್ರದಲ್ಲಿ ತೈಲ ಉತ್ಪಾದನೆಯನ್ನು ತಾತ್ಕಾಲಿಕವಾಗಿ ಸ್ಥಗಿತಗೊಳಿಸಿರುವುದಾಗಿ ಸೌದಿ ಅರೆಬಿಯಾ ಸರಕಾರ ಹೇಳಿತ್ತು.

ಜಾಗತಿಕ ಇಂಧನ ಮಾರುಕಟ್ಟೆಯಲ್ಲಿ ಅತ್ಯಂತ ಸೂಕ್ಷ್ಮ ಪರಿಸ್ಥಿತಿ ನೆಲೆಸಿರುವ ಈ ಸಂದರ್ಭದಲ್ಲಿ ತೈಲ ಉತ್ಪಾದನಾ ಕೇಂದ್ರಗಳನ್ನು ಗುರಿಯಾಗಿಸಿ ನಡೆಸಿರುವ ಸರಣಿ ದಾಳಿ ತೈಲ ಉತ್ಪಾದನೆ ಮತ್ತು ಪೂರೈಕೆ ಪ್ರಕ್ರಿಯೆಯ ಭದ್ರತೆಗೆ ಒಡ್ಡಿರುವ ಬೆದರಿಕೆಯಾಗಿದೆ ಎಂದು ಸೌದಿ ಅರೆಬಿಯಾ ಸರಕಾರ ಖಂಡಿಸಿದೆ. ಹೌದಿ ಬಂಡುಗೋರರ ದಾಳಿಯನ್ನು ಖಂಡಿಸಿರುವ ಅಮೆರಿಕ, ಸೌದಿ ಅರೆಬಿಯಾಕ್ಕೆ ಅಗತ್ಯವಿರುವ ಎಲ್ಲಾ ನೆರವನ್ನು ಒದಗಿಸುವುದಾಗಿ ವಾಗ್ದಾನ ನೀಡಿದೆ.


SHARE THIS

Author:

0 التعليقات: