Tuesday, 1 February 2022

ದೆಹಲಿ ಗಲಭೆ: 85ರ ವೃದ್ಧೆ ಅಕ್ಬರಿ ಬೇಗಂ ಸಾವಿಗೆ ಕಾರಣರಾಗಿದ್ದ ಇಬ್ಬರು ಆರೋಪಿಗಳಿಗೆ ಜಾಮೀನು

 

ದೆಹಲಿ ಗಲಭೆ: 85ರ ವೃದ್ಧೆ ಅಕ್ಬರಿ ಬೇಗಂ ಸಾವಿಗೆ ಕಾರಣರಾಗಿದ್ದ ಇಬ್ಬರು ಆರೋಪಿಗಳಿಗೆ ಜಾಮೀನು

ಹೊಸದಿಲ್ಲಿ: 2020 ರಲ್ಲಿ ನಡೆದ ಈಶಾನ್ಯ ದೆಹಲಿ ಗಲಭೆಯ ಸಂದರ್ಭದಲ್ಲಿ 85 ವರ್ಷದ ಮಹಿಳೆಯೊಬ್ಬರನ್ನು ಕೊಂದ  ಮೂವರು ಆರೋಪಿಗಳಲ್ಲಿ ಇಬ್ಬರಿಗೆ ದೆಹಲಿ ಹೈಕೋರ್ಟ್ ಮಂಗಳವಾರ ಜಾಮೀನು ನೀಡಿದೆ ಎಂದು Live Law ವರದಿ ಮಾಡಿದೆ.

ಗಲಭೆ ಸಂಧರ್ಭದಲ್ಲಿ 85ರ ಹರೆಯದ ಅಕ್ಬರಿ ಬೇಗಂ ಅವರ ಮನೆಗೆ ಗುಂಪೊಂದು ಬೆಂಕಿ ಹಚ್ಚಿದ ಪರಿಣಾಮ, ಬೇಗಂ ಉಸಿರುಗಟ್ಟಿ ಸಾವನ್ನಪ್ಪಿದ್ದರು. ನ್ಯಾಯಮೂರ್ತಿ ಸುಬ್ರಮೋನಿಯಂ ಪ್ರಸಾದ್ ಅವರು ಅರುಣ್ ಕುಮಾರ್ ಮತ್ತು ರವಿಕುಮಾರ್ ಎಂಬ ಇಬ್ಬರು ಆರೋಪಿಗಳಿಗೆ ಜಾಮೀನು ಮಂಜೂರು ಮಾಡಿದ್ದಾರೆ. ಆದರೆ, ಇನ್ನೋರ್ವ ಆರೋಪಿ ವಿಶಾಲ್ ಸಿಂಗ್ ಅವರಿಗೆ ಜಾಮೀನು ನಿರಾಕರಿಸಲಾಗಿದೆ ಎಂದು ವರದಿ ಹೇಳಿದೆ. 

ಬೇಗಂ ಪುತ್ರ ಮುಹಮ್ಮದ್ ಸಯೀದ್ ಸಲ್ಮಾನಿ ಅವರ ದೂರಿನ ಆಧಾರದ ಮೇಲೆ ಫೆಬ್ರವರಿ 27, 2020 ರಂದು ಭಜನಪುರ ಪೊಲೀಸ್ ಠಾಣೆಯಲ್ಲಿ ಎಫ್‌ಐಆರ್‌ ದಾಖಲಿಸಲಾಗಿತ್ತು. ಸಲ್ಮಾನಿ ನೀಡಿದ ಪ್ರಕಾರ, ಕೋಮುವಾದಿ ಘೋಷಣೆಗಳನ್ನು ಕೂಗುತ್ತಾ ಭಾರಿ ಜನಸಮೂಹ ಅವರ ಮನೆಯ ಹೊರಗೆ ಜಮಾಯಿಸಿತ್ತು. ಗುಂಪೊಂದು ಮನೆಗೆ ನುಗ್ಗಿ ಬೀಗ ಮುರಿದು ನಂತರ ಬೆಂಕಿ ಹಚ್ಚಿದೆ. ತಕ್ಷಣವೇ, ಅವರ ಕುಟುಂಬ ಮತ್ತು 10 ಉದ್ಯೋಗಿಗಳು ಮಾಳಿಗೆಗೆ ಓಡಿಹೋದರು, ಆದರೆ ಅವರ ತಾಯಿ ಬೇಗಂ ಅವರ ವಯಸ್ಸಿನ ಕಾರಣದಿಂದ ಮೇಲೇರಲು ಸಾಧ್ಯವಾಗಲಿಲ್ಲ ಎಂದು ಸಲ್ಮಾನಿ ಹೇಳಿದ್ದಾರೆ. ದಾಳಿ ಮಾಡಿದ ಗುಂಪು ಮನೆಯಲ್ಲಿದ್ದ 8 ಲಕ್ಷ ನಗದು ಹಾಗೂ ಚಿನ್ನಾಭರಣಗಳನ್ನು ದೋಚಿದ್ದಾರೆ ಎಂದು ಸಲ್ಮಾನಿ ಹೇಳಿದ್ದಾರೆ.

ಚಾರ್ಜ್‌ಶೀಟ್ ಪ್ರಕಾರ, ಪೊಲೀಸ್ ಸಿಬ್ಬಂದಿ, ಪ್ರತ್ಯಕ್ಷದರ್ಶಿಗಳು ಮತ್ತು ಬೆಂಕಿಯನ್ನು ನಂದಿಸಲು ಸಹಾಯ ಮಾಡಿದವರ ಹೇಳಿಕೆಯು ದಾಳಿ ಮಾಡಿರುವ ಗುಂಪಿನ ಸದಸ್ಯರನ್ನು ಗುರುತಿಸಲು ಸಹಾಯ ಮಾಡಿದೆ ಎಂದು ಪಿಟಿಐ ವರದಿ ಮಾಡಿದೆ. ಅದರ ಆಧಾರದ ಮೇಲೆ ಜೂನ್ 2020 ರಲ್ಲಿ, ದೆಹಲಿ ಪೊಲೀಸರು   ಅರುಣ್ ಕುಮಾರ್, ವರುಣ್ ಕುಮಾರ್, ವಿಶಾಲ್ ಸಿಂಗ್, ರವಿ ಕುಮಾರ್, ಪ್ರಕಾಶ್ ಚಂದ್ ಮತ್ತು ಸೂರಜ್ ಸಿಂಗ್ ಎಂಬವರ ವಿರುದ್ಧ ಆರೋಪಪಟ್ಟಿ ಸಲ್ಲಿಸಿದ್ದರು.

ಈ ಆರು ಜನರ ವಿರುದ್ಧ ಗಲಭೆ, ಕಾನೂನುಬಾಹಿರ ಸಭೆ, ಕೊಲೆ, ಕೊಲೆ ಯತ್ನ, ಕೊಲೆಯೊಂದಿಗೆ ಡಕಾಯಿತಿ, ಬೆಂಕಿಯಿಂದ ಕಿಡಿಗೇಡಿತನ, ಅತಿಕ್ರಮಣ, ಸಾಕ್ಷ್ಯಾಧಾರಗಳ ನಾಶ, ಸಾರ್ವಜನಿಕ ಸೇವಕರ ಆದೇಶವನ್ನು ಉಲ್ಲಂಘಿಸುವುದು ಮತ್ತು ಭಾರತೀಯ ದಂಡ ಸಂಹಿತೆಯ ಅಡಿಯಲ್ಲಿ ಸಾಮಾನ್ಯ ಉದ್ದೇಶದ ಆರೋಪಗಳನ್ನು ಹೊರಿಸಲಾಗಿದೆ.


SHARE THIS

Author:

0 التعليقات: