Monday, 24 May 2021

ಬೆಡ್ ಬ್ಲಾಕಿಂಗ್ ಪ್ರಕರಣ: ಆರೋಪ ಮುಕ್ತರಾದರೂ ಕೆಲಸವಿಲ್ಲದೆ ಸಂಕಷ್ಟಕ್ಕೆ ಸಿಲುಕಿದ 17 ನೌಕರರು


ಬೆಡ್ ಬ್ಲಾಕಿಂಗ್ ಪ್ರಕರಣ: ಆರೋಪ ಮುಕ್ತರಾದರೂ ಕೆಲಸವಿಲ್ಲದೆ ಸಂಕಷ್ಟಕ್ಕೆ ಸಿಲುಕಿದ 17 ನೌಕರರು 

ಬೆಂಗಳೂರು, ಮೇ 25: ಬಿಬಿಎಂಪಿ ಬೆಂಗಳೂರು ದಕ್ಷಿಣ ವಲಯ ವಾರ್ ರೂಂನಲ್ಲಿ ನಡೆದ 'ಬೆಡ್ ಬ್ಲಾಕಿಂಗ್' ಪ್ರಕರಣ ಸಂಬಂಧ ಸಂಸದ ತೇಜಸ್ವಿ ಸೂರ್ಯ ನೇತೃತ್ವದ ಬಿಜೆಪಿ ಶಾಸಕರ ತಂಡದಿಂದ ಆರೋಪಕ್ಕೆ ಗುರಿಯಾಗಿ ಅಮಾನತುಗೊಂಡಿದ್ದ 17 ಮಂದಿ ನೌಕರರು, ಪೊಲೀಸರ ತನಿಖೆಯಲ್ಲಿ ಆರೋಪ ಮುಕ್ತರಾದರೂ ಕೆಲಸವಿಲ್ಲದೆ ಸಂಕಷ್ಟಕ್ಕೆ ಸಿಲುಕಿದ್ದಾರೆ.

ಅಮಾನತುಗೊಂಡಿದ್ದ 17 ಮಂದಿ ಸಿಬ್ಬಂದಿ ಪೈಕಿ 5 ಮಂದಿ ಆರೋಪದ ಹಿನ್ನೆಲೆಯಲ್ಲಿ ಸ್ವಯಂ ಪ್ರೇರಿತರಾಗಿ ಕರ್ತವ್ಯಕ್ಕೆ ಗೈರು ಹಾಜರಾಗಿದ್ದಾರೆ. ಉಳಿದ 12 ಮಂದಿ ಕರ್ತವ್ಯಕ್ಕೆ ಹಾಜರಾಗಲು ಉತ್ಸುಕರಾಗಿದ್ದರೂ ಕ್ರಿಸ್ಟೆಲ್ ಇನ್ಫೋಟೆಕ್ ಸಂಸ್ಥೆಯ ಮುಖ್ಯಸ್ಥರು ಸರಿಯಾಗಿ ಸ್ಪಂದಿಸದ ಹಿನ್ನೆಲೆಯಲ್ಲಿ 12 ಮಂದಿ ಕೆಲಸವಿಲ್ಲದೆ, ಲಾಕ್‍ಡೌನ್ ವೇಳೆ ಹೊಸ ಕೆಲಸದ ಹುಡುಕಾಟದಲ್ಲಿ ತೊಡಗಿದ್ದಾರೆ. ಅಲ್ಲದೆ, 17 ಮಂದಿ ಸಿಬ್ಬಂದಿಗೆ ಹಿಂದಿನ ತಿಂಗಳ ವೇತನವನ್ನು ನೀಡದ ಹಿನ್ನೆಲೆಯಲ್ಲಿ ಬದುಕು ಸಾಗಿಸಲು ಕಷ್ಟ ಪಡುತ್ತಿದ್ದಾರೆ ಎನ್ನಲಾಗಿದೆ.

ಮೇ 4ರಂದು ಸಂಸದ ತೇಜಸ್ವಿ ಸೂರ್ಯ, ಶಾಸಕರಾದ ರವಿಸುಬ್ರಹ್ಮಣ್ಯ, ಸತೀಶ್ ರೆಡ್ಡಿ ಹಾಗೂ ಉದಯ್ ಗರುಡಾಚಾರ್ ನೇತೃತ್ವದ ತಂಡ 'ಬೆಡ್ ಬ್ಲಾಕಿಂಗ್' ಪ್ರಕರಣ ಸಂಬಂಧ 17 ಮಂದಿ ಸಿಬ್ಬಂದಿಯ ವಿರುದ್ಧ ಆರೋಪ ಮಾಡಿತ್ತು. ಇವರನ್ನೆಲ್ಲ ಯಾರು ಮತ್ತು ಏಕೆ ನೇಮಕ ಮಾಡಿಕೊಂಡಿದ್ದು, ಇದು `ಮದರಸವೋ ಅಥವಾ ಕಾರ್ಪೋರೇಷನ್ ಕೋವಿಡ್ ವಾರ್ ರೂಮೋ' ಎಂದು ಪ್ರಶ್ನಿಸಲಾಗಿತ್ತು.

ಕೆಲಸ ಕಳೆದುಕೊಂಡು ಮನೆಯಲ್ಲಿರುವ ಅಕ್ರಮ್(ಹೆಸರು ಬದಲಾಯಿಸಲಾಗಿದೆ) 'ವಾರ್ತಾಭಾರತಿ' ಪತ್ರಿಕೆಯೊಂದಿಗೆ ಮಾತನಾಡಿ, `ನಾವು ಮುಸ್ಲಿಮ್ ಆಗಿ ಹುಟ್ಟಿದ್ದೇ ತಪ್ಪಾಗಿದೆ. ನಮ್ಮ ವಿರುದ್ಧ ಬಿಜೆಪಿಯ ಸಂಸದರು ಹಾಗೂ ಶಾಸಕರು ಆರೋಪ ಮಾಡಿದ ಬಳಿಕ ನಮ್ಮ ಉದ್ಯೋಗ ಹೋಯಿತು. ಪೊಲೀಸರ ತನಿಖೆಯಲ್ಲಿ ನಾವು ಆರೋಪ ಮುಕ್ತರಾದಾಗ ಮರಳಿ ಕೆಲಸಕ್ಕೆ ತೆಗೆದುಕೊಳ್ಳುವ ಭರವಸೆ ಇತ್ತು. ಆದರೆ, ಈವರೆಗೂ ನಮಗೆ ಕೆಲಸಕ್ಕೆ ಕರೆ ಬಂದಿಲ್ಲ' ಎಂದು ಬೇಸರ ವ್ಯಕ್ತಪಡಿಸಿದರು.

'ಕೋವಿಡ್ ಸಂಕಷ್ಟದ ಸಮಯದಲ್ಲಿ ರೋಗಿಗಳ ಸೇವೆ ಎಂದು ಭಾವಿಸಿ ನಾವು ನಿಸ್ವಾರ್ಥದಿಂದ ಕೆಲಸ ಮಾಡುತ್ತಿದ್ದೇವು. ನಮಗೆ ಕ್ರಿಸ್ಟೆಲ್ ಇನ್ಫೋಟೆಕ್ ಸಂಸ್ಥೆ ಕೊಡುತ್ತಿದ್ದ 13 ಸಾವಿರ ರೂ. ಸಂಬಳ ಯಾವುದಕ್ಕೂ ಸಾಲುತ್ತಿರಲಿಲ್ಲ. ನಮಗೆ ಕೆಲಸದ ತೃಪ್ತಿ ಇತ್ತು. ನಮ್ಮ ವಿರುದ್ಧ ಆರೋಪ ಬಂದ ಬಳಿಕ ಮಾನಸಿಕವಾಗಿ ನಾವು ಸಂಪೂರ್ಣ ಕುಗ್ಗಿದ್ದೇವೆ. ಆದರೂ, ಕೌಟುಂಬ ನಿರ್ವಹಣೆ ಜವಾಬ್ದಾರಿ ಹಿನ್ನೆಲೆಯಲ್ಲಿ ಕರ್ತವ್ಯಕ್ಕೆ ಮರಳಲು ನಾವು 12 ಮಂದಿ ಪತ್ರವನ್ನು ಕೊಟ್ಟಿದ್ದೆವು. ಸಂಸ್ಥೆ ಕಡೆಯಿಂದ ಈವರೆಗೂ ಕೆಲಸಕ್ಕೆ ಬರಲು ಸ್ಪಂದಿಸುತ್ತಿಲ್ಲ. ಹೀಗಾಗಿ ನಾನು ಹೊಸ ಕೆಲಸದ ಹುಡುಕಾಟದಲ್ಲಿದ್ದೇನೆ' ಎಂದು ಅಕ್ರಮ್ ತಿಳಿಸಿದರು.

'ಆರೋಪ ಹೊರಿಸಲಾದ 17 ಮಂದಿ ಮುಸ್ಲಿಮ್ ಸಿಬ್ಬಂದಿ ಪೈಕಿ 5 ಮಂದಿ ಕರ್ತವ್ಯಕ್ಕೆ ಗೈರುಹಾಜರಾಗಿದ್ದು, ಉಳಿದ 12 ಮಂದಿಯ ಪೈಕಿ ಒಬ್ಬಿಬ್ಬರನ್ನು ಹೊರತುಪಡಿಸಿದರೆ ಉಳಿದ 10 ಮಂದಿ ಇಂದು ಕೆಲಸವಿಲ್ಲದೆ ನಿರುದ್ಯೋಗಿಗಳಾಗಿದ್ದೇವೆ. ಚಾಮರಾಜಪೇಟೆ ಶಾಸಕ ಝಮೀರ್ ಅಹ್ಮದ್ ಖಾನ್ ಅವರು ನಮಗೆ ಕೆಲಸದ ಭರವಸೆ ನೀಡಿದ್ದರು. ನಮಗೆ ಈ ವರೆಗೂ ಕೆಲಸವಿಲ್ಲ. ಅಲ್ಲದೆ, ಸಂಸ್ಥೆ ನಮಗೆ ಹಿಂದಿನ ಸಂಬಳವನ್ನು ಈವರೆಗೂ ನೀಡಿಲ್ಲ. ಕೂಡಲೇ ಬಾಕಿ ವೇತನ ನೀಡಿದರೆ ಒಳ್ಳೆಯದು. ನಮ್ಮನ್ನು ಕೆಲಸಕ್ಕೆ ಪುನಃ ತೆಗೆದುಕೊಳ್ಳಬೇಕು' ಎಂದು ಅಕ್ರಮ್ ಒತ್ತಾಯಿಸಿದರು.



SHARE THIS

Author:

0 التعليقات: