Friday, 29 January 2021

ದೆಹಲಿ ಬಾಂಬ್ ಸ್ಫೋಟ : ಶಂಕಿತ ಆರೋಪಿಗಳ ರೇಖಾ ಚಿತ್ರ ಸಿದ್ಧ


 ದೆಹಲಿ ಬಾಂಬ್ ಸ್ಫೋಟ : ಶಂಕಿತ ಆರೋಪಿಗಳ ರೇಖಾ ಚಿತ್ರ ಸಿದ್ಧ

ನವದೆಹಲಿ, ಜ.27- ದೆಹಲಿಯ ಇಸ್ರೇಲ್ ರಾಯಬಾರ ಕಚೇರಿ ಸಮೀಪ ನಡೆದಿರುವ ಸ್ಫೋಟದ ತನಿಖೆ ಚುರುಕುಗೊಂಡಿದ್ದು, ಕ್ಯಾಬ್ ಚಾಲಕನ ಮಾಹಿತಿ ಆಧರಿಸಿ ಶಂಕಿತ ಆರೋಪಿಗಳ ರೇಖಾ ಚಿತ್ರಗಳನ್ನು ಸಿದ್ಧ ಪಡಿಸಲಾಗಿದೆ. ದೆಹಲಿಯ ಪ್ರತಿಷ್ಠಿತ ಡಾ.ಎ.ಪಿ.ಜೆ.ಅಬ್ದುಲ್ ಕಲಾಂ ರಸ್ತೆಯಲ್ಲಿರುವ ಇಸ್ರೇಲ್ ರಾಯಬಾರ ಕಚೇರಿಯ ಸಮೀಪ ನಿನ್ನೆ ಸಂಜೆ 5 ಗಂಟೆ ಸುಮಾರಿಗೆ ಐಇಡಿ ಬಳಸಿ ಸ್ಫೋಟ ನಡೆಸಲಾಗಿದೆ. ಇದು ಲಘು ಪ್ರಮಾಣದ ಸ್ಫೋಟವಾಗಿರುವುದರಿಂದ ಯಾವುದೇ ಪ್ರಾಣ ಹಾನಿಯಾಗಿಲ್ಲ. ನಾಲ್ಕೈದು ಕಾರುಗಳಿಗೆ ಸಣ್ಣ ಪ್ರಮಾಣದ ಹಾನಿಯಾಗಿದೆ.

ಘಟನೆ ಬಳಿಕ ಪ್ರತಿಕ್ರಿಯಿಸಿರುವ ಇಸ್ರೇಲ್, ಇದು ಭಯೋತ್ಪಾದನೆಯ ಕೃತ್ಯ ಎಂದು ವ್ಯಾಖ್ಯಾನಿಸಿದೆ. ಭಾರತೀಯ ಸಂಸ್ಥೆಗಳ ಜೊತೆಗೆ ಇಸ್ರೇಲ್‍ನ ಸಂಸ್ಥೆಗಳು ತನಿಖೆಗೆ ಕೈ ಜೋಡಿಸಲಿವೆ. ಭಾರತ ಮತ್ತು ಇಸ್ರೇಲ್‍ನ ಸೌಹಾರ್ದಯುತ ಸಂಬಂಧವನ್ನು ಕದಡಲು ನಡೆಸಿರುವ ಈ ಪ್ರಯತ್ನ ಯಶಸ್ವಿಯಾಗುವುದಿಲ್ಲ ಎಂದು ಹೇಳಿದೆ.

2020ರ ಜನವರಿಯಲ್ಲಿ ಅಮೇರಿಕಾದ ಅಧ್ಯಕ್ಷ ರಾಗಿದ್ದ ಡೋನಾಲ್ಡ್ ಟ್ರಂಪ್ ಅವರ ಆದೇಶದ ಮೇರೆಗೆ ಇರಾನ್‍ನ ಜನರಲ್ ಕ್ವಾಸೀಮ್ ಸೋಲೇಮಾನಿ ಮತ್ತು ಪರಮಾಣು ತಜ್ಞ ಮೋಸೇನ್ ಫಕ್ರೇದಾರನ್ನು ಹತ್ಯೆ ಮಾಡಲಾಗಿತ್ತು. ಬಾಗ್ದಾಗ್ ವಿಮಾನ ನಿಲ್ದಾಣದಲ್ಲಿ ದ್ರೋಣ್ ಮೂಲಕ ಏರ್ ಸ್ಟ್ರೈಕ್ ಮಾಡಿ ಹತ್ಯೆ ಮಾಡಲಾಗಿತ್ತು. ಅದಕ್ಕೆ ಪ್ರತಿಕಾರವಾಗಿ ಈ ಸ್ಫೋಟ ನಡೆಸಿರಬಹುದು ಎಂದು ಶಂಕಿಸಲಾಗಿದೆ.

ಸ್ಫೋಟದ ಬಳಿಕ ನಡೆದ ಸ್ಥಳ ಪರಿಶೀಲನೆಯಲ್ಲಿ ಮುಚ್ಚಿದ ಲಕೋಟೆಯಲ್ಲಿರುವ ಪತ್ರವೊಂದು ಪತ್ತೆಯಾಗಿದ್ದು, ಅದರಲ್ಲಿ ಇದು ಟ್ರೇಲರ್ ಮಾತ್ರ ಸಿನಿಮಾ ಇನ್ನೂ ಮುಂದೆ ಇದೆ ಎಂದು ಬರೆದಿರುವುದಾಗಿ ಮೂಲಗಳು ತಿಳಿಸಿವೆ. ಮುಚ್ಚಿದ ಲಕೋಟೆಯಲ್ಲಿರುವ ಪತ್ರ ವಶ ಪಡಿಸಿಕೊಂಡಿರುವುದನ್ನು ಖಚಿತ ಪಡಿಸಿರುವ ದೆಹಲಿ ಪೊಲೀಸ್ ಹೆಚ್ಚುವರಿ ಸಾರ್ವಜನಿಕ ಸಂಪರ್ಕಾಧಿಕಾರಿ ಅನಿಲ್ ಮಿತ್ತಲ್ ಅವರು, ಪತ್ರದಲ್ಲಿರುವ ಮಾಹಿತಿಯನ್ನು ಬಹಿರಂಗ ಪಡಿಸಲು ನಿರಾಕರಿಸಿದ್ದಾರೆ.

ಐಇಡಿ ಸ್ಫೋಟಕದಲ್ಲಿ ತಂಪುಪಾನಿಯದ ಬಾಟಲ್‍ನ ಗಾಜಿನ ಚೂರು ಮತ್ತು ಬೇರಿಂಗ್ ಬಾಲ್‍ಗಳನ್ನು ಬಳಸಿರುವುದು ಸ್ಥಳ ಪರಿಶೀಲನೆ ನಡೆಸಿದ ವಿಧಿ ವಿಜ್ಞಾನ ಪ್ರಯೋಗಾಲಯದ ತಜ್ಞರಿಗೆ ತಿಳಿದು ಬಂದಿದೆ. ಬಾಲ್ ಬೇರಿಂಗ್ ಕಾರುಗಳಿಗೆ ಬಡಿದು ಹಾನಿಯಾಗಿದೆ

ದೆಹಲಿ ಪೊಲೀಸರು ಸಿಸಿಟಿವಿ ದೃಶ್ಯಾವಳಿಗಳನ್ನು ಪರಿಶೀಲನೆ ನಡೆಸಿರುವ ಸ್ಫೋಟಕಗಳನ್ನು ಎಸೆದು ಹೋಗಲು ಬಳಸಿದ ಕ್ಯಾಬ್‍ನ್ನು ಪತ್ತೆ ಹಚ್ಚಿದ್ದಾರೆ. ಕ್ಯಾಬ್‍ನ ಚಾಲಕನನ್ನು ವಶಕ್ಕೆ ಪಡೆದು, ಆತ ನೀಡಿದ ಮಾಹಿತಿ ಆಧರಿಸಿ ಇಬ್ಬರು ಶಂಕಿತರ ರೇಖಾ ಚಿತ್ರ ಸಿದ್ಧ ಪಡಿಸಲಾಗಿದೆ. ಈ ಮೂಲಕ ಸ್ಫೋಟದ ತನಿಖೆಯನ್ನು ಚುರುಕುಗೊಳಿಸಲಾಗಿದೆ.


SHARE THIS

Author:

0 التعليقات: