Tuesday, 1 December 2020

ಉಳ್ಳಾಲ ಬೋಟು ಅವಘಡ : ದುರಂತಕ್ಕೀಡಾದವರೆಲ್ಲ ಕುಟುಂಬದ ಆಧಾರಸ್ತಂಭ


 ಉಳ್ಳಾಲ ಬೋಟು ಅವಘಡ : ದುರಂತಕ್ಕೀಡಾದವರೆಲ್ಲ ಕುಟುಂಬದ ಆಧಾರಸ್ತಂಭ

ಮಂಗಳೂರು, ಡಿ.1: ಪರ್ಸಿನ್ ಬೋಟ್ ದುರಂತದಲ್ಲಿ ಮೃತಪಟ್ಟವರು ಹಾಗೂ ನಾಪತ್ತೆಯಾದವರು ಕಡುಬಡವರು. ಇವರನ್ನೇ ಆ ಕುಟುಂಬಗಳು ನೆಚ್ಚಿಕೊಂಡಿದ್ದವು. ಎಲ್ಲ ಹಿನ್ನೆಲೆಯಲ್ಲೂ ಇವರೇ ಆ ಕುಟುಂಬಗಳ ಆಧಾರ ಸ್ತಂಭವಾಗಿದ್ದರು ಎನ್ನುವುದು ಆಯಾ ಮೀನುಗಾರರ ನೆರೆಹೊರೆಯವರ ಆಂತರ್ಯದಿಂದ ಬರುವ ಮಾತುಗಳಾಗಿವೆ.

ಮೃತ ಬೊಕ್ಕಪಟ್ಣ ಪಾಂಡುರಂಗ ಸುವರ್ಣ ಮಧ್ಯವಯಸ್ಕರು. ಮನೆಯಲ್ಲಿ ಕಡುಬಡತನವಿದ್ದು, ಓರ್ವ ಪುತ್ರ ಇದ್ದು, ಕಾಲೇಜು ವಿದ್ಯಾರ್ಥಿ. ಪ್ರತಿದಿನ ದುಡಿದರೇ ತುತ್ತಿನ ಅನ್ನಕ್ಕೆ ದಾರಿಯಾಗುತ್ತದೆ ಎನ್ನುವುದು ಹತ್ತಿರದಿಂದ ಕಂಡವರ ಅಭಿಪ್ರಾಯ. ಇನ್ನು ಬೊಕ್ಕಪಟ್ಣ ಪ್ರೀತಂ ಅವಿವಾಹಿತ. ಈತ ಹೊರದೇಶದಲ್ಲಿದ್ದ. ಲಾಕ್‌ಡೌನ್ ಬಳಿಕ ಊರಿಗೆ ವಾಪಸಾಗಿದ್ದ. ಮರಳಿ ಬೋಟ್‌ನಲ್ಲಿ ಕೆಲಸಕ್ಕೆ ಸೇರಿಕೊಂಡಿದ್ದ. ನಾಪತ್ತೆಯಾದ ಚಿಂತನ್ ಕೂಡ ಅವಿವಾಹಿತ. ಈತನ ಮನೆಯ ಆರ್ಥಿಕ ಸ್ಥಿತಿಯೂ ಕಷ್ಟಕರವಾಗಿತ್ತು ಎಂದು ಕುಟುಂಬದ ಮೂಲಗಳು ತಿಳಿಸಿವೆ.

ನಾಪತ್ತೆಯಾದ ಕಸಬ ಬೆಂಗ್ರೆ ನಿವಾಸಿ ಮುಹಮ್ಮದ್ ಅನ್ಸರ್ ಮುಸ್ತಫಾ ಬಾಡಿಗೆ ಮನೆಯಲ್ಲಿ ವಾಸಿಸುತ್ತಿದ್ದರು. ಇವರಿಗೆ ಮೂವರು ಪುತ್ರರು, ಪುತ್ರಿ ಇದ್ದಾರೆ. ಮನೆಗೂ ಇವರೇ ಆರ್ಥಿಕವಾಗಿ ಸಹಾಯ ಮಾಡುತ್ತಿದ್ದರು. ಇವರು ಈ ಮೊದಲು ಹೊಟೇಲ್‌ನಲ್ಲಿ ಕೆಲಸ ಮಾಡಿಕೊಂಡಿದ್ದರು. ಅಲ್ಲಿ ಕುಟುಂಬ ಸಲಹುವಷ್ಟು ವೇತನ ಸಿಗದ ಹಿನ್ನೆಲೆ ಮೀನುಗಾರಿಕಾ ಕಾರ್ಮಿಕನಾಗಿ ದುಡಿಯುತ್ತಿದ್ದ.

ಕಳೆದ ಎರಡು ಮೂರು ಸಾರಿ ಆಳ ಸಮುದ್ರಕ್ಕೆ ತೆರಳುವ ಬೋಟುಗಳ ಜೊತೆ ಅನ್ಸರ್ ಕೂಡ ಹೋಗುತ್ತಿದ್ದ. ಅದರಿಂದ ಬರುವ ಆದಾಯದಿಂದಲೇ ಮನೆಯನ್ನು ನಡೆಸುತ್ತಿದ್ದ ಎಂದು ಹತ್ತಿರದ ಸಂಬಂಧಿಗಳು ಮಾಹಿತಿ ನೀಡಿದ್ದಾರೆ.

ಮೀನುಗಾರಿಕೆಗೆ ಸೋಮವಾರ ನಸುಕಿನ ಜಾವ ತೆರಳಿದ್ದ ಅನ್ಸರ್ ರಾತ್ರಿ 8 ಗಂಟೆ ಸುಮಾರಿಗೆ ತನ್ನ ಮಗಳ ಜೊತೆ ಮಾತನಾಡಿದ್ದ. ಮನೆಗೆ ಬೇಗನೇ ವಾಪಸಾಗುವುದಾಗಿ ಹೇಳಿದ್ದ ಮಾತುಗಳನ್ನು ಕುಟುಂಬಸ್ಥರು ಕಣ್ಣೀರಿಡುತ್ತಾ ಉಸುರಿದರು. ಅನ್ಸರ್ ನಾಪತ್ತೆಯಾದ ವಿಷಯವು ಪತ್ನಿಯ ಗಮನಕ್ಕೆ ಬರುತ್ತಿದ್ದಂತೆ ಅವರು ಮೂರ್ಛೆ ಹೋಗಿದ್ದರು.

ಕಸಬ ಬೆಂಗ್ರೆಯ ಮುಹಮ್ಮದ್ ಹಸೈನಾರ್‌ಗೆ ಇಬ್ಬರು ಮಕ್ಕಳಿದ್ದಾರೆ. ಇವರು ಕೂಡ ಬಾಡಿಗೆ ಮನೆಯಲ್ಲಿ ವಾಸಿಸುತ್ತಿದ್ದರು. ನಾಲ್ವರು ಸಹೋದರಿಯರ ಮದುವೆ ಮಾಡಿದ್ದರು. ಬಳಿಕ ಬಾಡಿಗೆ ಮನೆಯಲ್ಲೇ ಇದ್ದರು. ದಿನಗೂಲಿಯಿಂದ ಬದುಕು ಸವೆಸುತ್ತಿದ್ದರು. ಇನ್ನೋರ್ವ ಕಸಬ ಬೆಂಗ್ರೆಯ ಝಿಯಾವುಲ್ಲಾ ಎಂಬವರಿಗೂ ನಾಲ್ವರು ಮಕ್ಕಳಿದ್ದಾರೆ. ಹೀಗೆ ಮೃತಪಟ್ಟವರು ಹಾಗೂ ನಾಪತ್ತೆಯಾದವರು ಬಡತನದಲ್ಲೇ ಬೇಯುತ್ತಿದ್ದರು. ಜೀವನದ ಬಂಡಿ ಸಾಗಿಸಲು ಜೀವ ಪಣಕ್ಕಿಟ್ಟು ಸಾಗರದ ಒಡಲಲ್ಲಿ ಆಹಾರದ ಹುಡುಕಾಟದಲ್ಲಿ ಸಂಕಷ್ಟಕ್ಕೀಡಾಗಿದ್ದಾರೆ.


SHARE THIS

Author:

0 التعليقات: